Julian Nagelsmann, aðalþjálfari RB Leipzig, segir að það séu engar viðræður í gangi milli sín og Bayern Munchen.

Lothar Matthaus, goðsögn í þýskum fótbolta, hélt því fram í gær að Nagelsmann myndi taka við starfinu hjá Bayern þegar Hans Dieter-Flick myndi yfirgefa félagið og væntanlega taka við þýska landsliðinu.

Joachim Löw er að hætta sem þjálfari landsliðsins í sumar eftir fimmtán ár í starfi. Flick er sagður efstur á blaði hjá þýska knattspyrnusambandinu.

„Þeir vilja Hansi Flick og ég held, eða öllu heldur er ég sannfærður um að Hansi Flick verður ekki lengur þjálfari Bayern eftir tímabilið," sagði Matthaus.

„Það þýðir að heimaleikurinn gegn Augsburg verður síðasti leikurinn sem aðalþjálfari Bayern."

Nagelsmann hefur svarað fyrir þau ummæli Matthaus sem féllu í kjölfarið, að Nagelsmann væri þegar í viðræðum við Bayern.

„Það eru engar og hafa engar viðræður verið við Bayern," sagði hinn 33 ára gamli Nagelsmann á blaðamannafundi í gær.

„Ég hef ekki hugmynd hvar Lothar fékk sínar upplýsingar, ég get staðfest að hvorki ég né umboðsmaður minn höfum rætt við Bayern. Ég er samningsbundinn RB út tímabilið 2022/23," bætti Nagelsmann við.