Einvígi Keflavíkur og ÍR fært á miðvikudag og sunnudag

Lokaumferð Lengjudeildarinnar fór fram á laugardag og ÍBV tryggði sér toppsætið og þar með sæti í Bestu deildinni.

Þá varð ljóst hvaða lið mætast í undanúrslitum umspilsins en sigurliðin þar leika svo stakan úrslitaleik á Laugardalsvelli, 50 milljóna króna leikinn, um að fylgja Eyjamönnum upp.

Keflavík mætir ÍR og Fjölnir leikur gegn Aftureldingu í undanúrslitum, þar sem leikið verður heima og að heiman. Keflavík og ÍR hafa komist að samkomulagi um að breyta leiktímum svo þeir verði hentugri fyrir áhorfendur.

Fyrri leikurinn verður í Breiðholti á miðvikudag en sá seinni í Keflavík á sunnudag.

Afturelding og Fjölnir mætast á áður auglýstum tímum, undir ljósunum í Mosfellsbæ á fimmtudagskvöld og svo í Grafarvogi 15:45 næsta mánudag. Ástæðan fyrir því að spilað er svona snemma dags á mánudag er vegna birtuskilyrða en ekki eru flóðljós við völlinn.