„Tilfinningin er geggjuð, ég er ógeðslega spenntur; sjaldan verið jafn spenntur að byrja nýtt tímabil. Ég get ekki beðið eftir að byrja að æfa með strákunum og kynnast öllu lífinu upp á Skaga," segir Hinrik sem mun flytja á Akranes.

„Mér fannst það sem þeir gerðu til að ná í mig, og hvað þeir vildu mig mikið, kveikti mjög vel í mér. Það var fyrst og fremst mjög erfitt að fara frá uppeldisliðinu og klúbbnum sem ég hef verið í síðan ég var fjögurra ára, ég veit líka að staðan í Þrótti núna er geggjuð; mikil uppbygging og allt fólkið og leikmannahópurinn núna er geggjaður. Ég er alveg viss um að Þróttur muni ná mjög langt á næsta tímabili. Það þurfti að vera eitthvað ógeðslega spennandi og þetta var það."

Umgjörðin og umhverfið heillar
Hvað var það sem menn af Skaganum gerðu til að sannfæra þig?

„Þeir eru með góða stefnu, eru með flotta umgjörð í kringum liðið, eru að styrkja innviðina sérstaklega. Það er hálfatvinnumannaumhverfi sem er að heilla mig mikið. Ég held ég geti tekið góð skref þarna."

Arnór Smárason, fyrirliði ÍA, ræddi við Hinrik áður en hann tók ákvörðun. „Hann hjálpaði mér mikið, virðist vera algjör toppgaur. Það var ógeðslega mikill spenningur hjá þeim að fá mig, ég fann það og fann að þetta var rétt."

Hafðiru úr mörgu að velja? Var búið að samþykkja mörg tilboð?

„Það voru nokkur lið sem höfðu áhuga, en það er bara þannig að ef þú ferð í eitthvað 'all in' þá færðu það oftast. Það var bara þannig með Skagamenn."

Hann var sérstaklega spurður hvort hann hefði rætt við FH, sem er félagið þar sem faðir hans, Hörður Magnússon, gerði garðinn fræga.

„Auðvitað var það mögulega einhver séns, en á endanum var þetta lendingin og ég er gríðarlega ánægður með það."

Viss um að hann mun snúa aftur í Þrótt einn daginn
Var lykilatriði að liðið væri í efstu deild?

„Já, mér fannst það. Mér fannst ekki rétt að fara frá Þrótti og vera fara spila á móti Þrótti í fyrstu deild, það heillar mig ekki. Ég sé fram á að geta styrkt liðið hjá ÍA og ég er ekki að fara frá Þrótti til að vera spila eitthvað lítið. Auðvitað er það undir mér komið, fer eftir hvernig ég stend mig, hvort ég spila eða ekki. Ég sé fram á mikla möguleika að geta hjálpað liðinu og það var planið. Ég er samt viss um að ég mun snúa aftur til Þróttar einn daginn."

Hinrik hefur tekið miklum framförum síðustu ár. „Ég þakka þjálfurunum sem ég hef haft, yngri flokka þjálfarana sem hafa verið með mig og síðustu tvö ár með Jeffsy og hópnum. Hópurinn í Þrótti er geggjaður, geggjaður andi sem hefur hjálpað mér mjög mikið. Það er þannig að með því að spila fullorðinsbolta í 2-3 ár þá muntu bæta þig," sagði Hinrik að lokum.