ÍBV vann þriðja deildarleikinn í röð í Lengjudeildinni er ÍR heimsótti liðið á Hásteinsvöll í dag.

Eyjakonur hafa verið á fljúgandi siglingu í síðustu leikjum og ætla að blanda sér í toppbaráttuna.

Olga Sevcova kom ÍBV í forystu á 27. mínútu. Helena Hekla Hlynsdóttir sendi Natalie Viggiano í gegn. Hún kom síðan með sendingu fyrir á Olgu sem kom boltanum í netið.

Natalie tvöfaldaði forystuna með góðui skallamarki eftir fyrirgjöf Selmu Bjartar Sigursveinsdóttur aðeins ellefu mínútum eftir fyrsta markið.

Eyjakonur voru með algera yfirburði seinni hluta fyrri hálfleiksins og hefðu getað skorað fleiri, en áhorfendur þurftu að bíða aðeins lengur eftir þriðja markinu.

Það gerði Viktorija Zaicikova á 53. mínútu. Olga sendi boltann á Selmu sem kom með þessa laglegu fyrirgjöf á Viktoriju og náði hún að setja boltann í netið úr þröngu færi.

Heimakonur náðu að sigla þessum sigri örugglega heim og er liðið nú í 4. sæti með 16 stig á meðan ÍR er á fram á botninum með aðeins 4 stig.