„Ég hélt ég myndi nú ekki standa skælbrosandi hérna á KA vellinum eftir að hafa tapað 5-1, en jú þetta eru mjög blendnar tilfinningar. Þetta var alls ekki góður leikur hjá okkur. Við vorum bara á eftir í öllu, vorum á eftir í öllum návígum, vorum að tapa einn á einn baráttu um allan völl. Menn voru sofandi í dekkningunum, talningin í pressunni var ekki góð, þetta var bara heilt yfir mjög slakur leikur hjá okkur,'' sagði Lárus Orri Sigurðsson, þjálfari ÍA, eftir 5-1 tap gegn KA í neðri hluta Bestu-deildar karla í dag. Þrátt fyrir þungt tap eru Skagamenn öruggir með sæti sitt í deildinni eftir jafnftefli Aftureldingar og Vestra.
Lestu um leikinn: KA 5 - 1 ÍA
Var spennustigið skrítið?
„Já veistu ég held það, það er náttúrulega alltaf gott að vera vitur eftir á en fyrir leikinn þá töldum við að liðið væri 100% klárt. Við erum búnir að keyra ansi hart á leikmenn í þessu frí, þetta er búið að vera erfitt frí! Dagarnir hafa verið lengi að líða, þannig að ef að ég horfi á leikinn eftir að þá held ég að það hafi verið rangt spennustig. Menn voru einhvernveginn dofnir, menn komust ekki almennilega í tæklingarnar og þetta var ekki Skagaliðið sem að við höfum séð í undanförnum leikjum,'' sagði Lárus Orri.
Skagamaðurinn Jón Þór Hauksson stýrir nú Vestra og það var flautumark þeirra gegn Aftureldingu sem að staðfesti það endanlega að Skagamenn geti ekki fallið í lokaumferð deildarinnar. Ljóðrænt myndu sumir segja og Lárus Orri talaði fallega um fyrrum þjálfara ÍA.
„Jú, það var það. Ég sagði í viðtali við Fótbolti.net eftir minn fyrsta leik að ég væri að taka við góðu búi af Jóni Þór. Fótbolti er furðulegur. Í byrjun þessa tímabils þá gerðust hlutir sem að gerast stundum í fótbolta. Maður lendir bara stundum í svona hlutum og hann lenti í þessu þarna, en hann skildi eftir mjög gott bú. Þjálfarateymið hérna uppá Akranesi er frábært, leikmannahópurinn góður, öll umgjörðin er alveg frábær. Þannig að þó að maður eigi kannski ekki að vera að skipta sér af þessari botnbaráttu núna, þar sem að við erum öruggir að þá er það mjög gott að Jón Þór skuli hafa tryggt okkur á endanum uppi.''
En framhaldið? Vill Lárus Orri vera áfram á Akranesi?
„Við ákváðum þegar við fórum í þetta að það yrði ekki talað saman fyrr en eftir tímabilið. Það hefur verið staðið við það, við ætlum ekki að ræða þetta neitt fyrr en tímabilið er búið. Það er að vísu nokkurnveginn þannig lagað búið hjá okkur. En ég á ekki von á því að það verði eitthvað farið í þessi mál fyrr en eftir síðasta leik. Ég ætla allavega ekki að hugsa um það í kvöld,'' sagði Lárus Orri.
Viðtalið má sjá í heild sinni í spilaranum hér að ofan.
