María Catharína Ólafsdóttir Gros er gengin til liðs við sænska stórliðið Linköping eftir að hafa verið lykilleikmaður í sterku liði Fortuna Sittard í hollenska boltanum.
María er 21 árs gömul og ólst hún upp hjá Þór á Akureyri og lék fyrir Þór/KA í meistaraflokki áður en hún hélt erlendis í atvinnumennsku. Hún spilaði fyrir skoska stórveldið Celtic áður en hún hélt til Sittard.
Nú gerir María, sem er einnig með sænskan ríkisborgararétt, þriggja og hálfs árs samning við Linköping.
María á 33 landsleiki að baki fyrir yngri landslið Íslands en hefur ekki enn fengið tækifæri með ógnarsterku A-landsliði þrátt fyrir flottan árangur með félagsliðum í Evrópu. María getur enn valið á milli íslenska og sænska landsliðsins.
„Ég er mjög spennt fyrir að hafa skrifað undir samning við Linköping. Það hefur verið draumur minn frá æsku að spila í efstu deild kvenna hérna í Svíþjóð og ég er stolt að fyrsti samningur minn við sænskt félag sé við stórt og sögufrægt félag eins og Linköping," sagði María meðal annars við undirskriftina.
Linköping er í efri hluta sænsku deildarinnar með 20 stig eftir 14 umferðir, en liðið hefur verið í titilbaráttu undanfarin ár og vann síðast deildina árin 2016 og 2017.
Linköping FC värvar isländsk U23-spelare med svenskt medborgarskap
— Linköping FC (@LinkopingFC) July 20, 2024
Välkommen till LFC Maria Ólafsdóttir Grós!
Läs mer på hemsidan ???? https://t.co/4YTQOeEUkY pic.twitter.com/dgdZAu97iM
Athugasemdir
