Hallgrímur Jónasson þjálfari KA var alls ekki ánægður með frammistöðu liðsins eftir tap gegn Vestra á Greifavellinum í dag.
Lestu um leikinn: KA 0 - 1 Vestri
„Ég er svekktur með ekki nógu góða frammistöðu. Ég sagði við strákana að ég væri meira svekktur með frammistöðuna en að fá á okkur mark á 92. mínútu. Við þurfum að gera betur, hinar tvær frammistöðurnar voru klárlega betri en í dag. Við áttum ekki skilið að vinna, nú er það bara að standa saman og gera betur það er það eina í stöðunni," sagði Haddi.
Liðið er aðeins með eitt stig eftir þrjá heimaleiki.
„Það er ekki nógu gott og við vitum það og þeir eru allir á heimavelli. Nú reynir á og við stöndum saman, gröfum aðeins hvað við þurfum að gera betur til að fá stig. Förum á æfingasvæðið og förum yfir þá hluti og erum klárir í bikarnum á fimmtudaginn gegn ÍR," sagði Haddi.
Haddi var spurður að því hvort hann búist við styrkingum á leikmannamarkaðinum áður en hann lokar á fimmtudaginn.
„Ég er ekki að fókusera á það. Við þurfum að fara finna okkur, vera við sjálfir aftur. Við þurfum að fá meiri gleði í þetta, hlaupa fyrir hvorn annan og fara að vinna fótboltaleiki," sagði Haddi.
