„Hann er klár í aðstoð. Hann er með sín endalausu ráð og veit ýmislegt. Hann hefur spilað leikinn og svo þjálfað í mörg ár á topp leveli. Það vita það allir að hann er með endalausan brunn af fótboltafjöri," sagði Hermann Hreiðarsson þjálfari ÍBV eftir 3-3 jafntefli gegn Fram í Bestu deildinni í gær.

Í hverju felst aðstoð Heimis helst?

„Það er bara sitt lítið af hverju. Við tölum mikið saman hvort sem er, hann bætir okkur, það er alveg klárt."

ÍBV er enn án sigurs, situr með fjögur stig á botni Bestu deildarinnar. Andri Rúnar Bjarnason, sóknarmaður ÍBV, segir öflugt fyrir liðið að fá Heimi inn í teymið.

„Hann hefur komið mjög vel inn í þetta. Það er geðveikt að fá svona reynslu og aðra sýn á þetta líka. Það er ekki hægt að segja nei þegar svona liðsstyrkur býðst," sagði Andri Rúnar eftir leikinn í gær.