Halli Hróðmars.
„Ég er grautfúll. Við vorum ekkert sérstakir í þessum leik. En fjöldin af einstaklingsmistökum var okkur ansi dýr í dag. Þegar við náðum að setja mörk á þá og gera leik úr þessu þá skora þeir innan við mínútu síðar í bæði skiptin. En við vissum það að við erum með ungt og reynslulítið lið. Það var vitað að það myndu koma hauskúpudagar þannig við þurfum að nýta þetta til að læra af og bæta okkur.“ sagði Haraldur Árni Hróðmarsson, þjálfari Grindavíkur, eftir leik hans manna við Völsung í dag sem fór 4-2 fyrir Húsvíkingum.
Lestu um leikinn: Grindavík 2 - 4 Völsungur
Meðalaldur byrjunarliðs Grindvíkinga var 23 ára og 18 ára á bekknum. Spilaði reynsluleysið inn í þetta í dag?
„Ég veit það ekki. Tilfinningin mín var sú að með aðeins meiri kænsku og leiki á bakinu að þá hefðum við komið okkur út úr aðstæðunum áður en þær eru of erfiðar. Ef að það mekar sens. Við þurfum að vera klókari, miklu klókari. Það kemur bara með spiluðum leikjum. Ég ætla þess að mínir menn verða æstir í það að svara þessu í næsta leik. En þetta er þungt í dag. Mjög þungt.“
Hvar tapaðist leikurinn og hvað hefði Grindavík þurft að gera betur í dag?
„Við hefðum átt að skora úr dauðafærunum sem við fáum í stöðunni 0-0. Við fáum algjör dauðafæri einn á móti markmanni og fyrir opnu marki. Klikkum á því, þeir skora eftir að leikmaður hjá mér rennur með boltann. Þá fannst mér menn stressast svolítið og leið illa og urðu litlir í sér. Við náðum aðeins að herða okkur í hálfleik. Seinni hálfleikurinn náttúrulega bara fer fram á vallarhelmingi Völsungs. En við sköpum okkur samt ekkert. Það er ýmislegt sem ég er óánægður með akkúrat núna.“
Grindavík fékk á sig ansi klaufaleg mörk sem Halli var ekki ánægður með.
„Tek ekkert af þeim. Virkilega flott hjá Völsungi og þeir eru búnir að standa sig vel í sumar. Ég ætla ekki að tala niður til þeirra að nokkru leyti en ég er að enga síður sammála því. Við vissum hvaða styrkeika þeir hafa, við vissum af hraðanum í Jakobi og við vissum að það væru ákveðnir staðir sem við mættum ekki tapa boltanum og hvað myndi gerast ef við myndum tapa honum. En við náum ekki að koma í veg fyrir það og töpuðum sanngjarnt.“
Hvernig lýst Halla á framhaldið og þessa byrjun?
„Bara vel. Við erum í ferli að reyna að vera betri og læra af hverjum leik. Það verður stórlærdómur sem menn vonandi draga af þessu. Fullt gott í þessum leik líka. Tek það ekki af mínum mönnum að það var ekki uppgjöf eða neitt þannig. Fáum Adam núna inn, búnir að sakna hans, við erum ánægðir með það. Við erum alltaf spenntir að spila við liðin og hvað þá toppliðið á útivelli.“ sagði Halli að lokum.
Viðtalið við Harald má sjá í heild sinni í spilaranum hér að ofan.
Athugasemdir
