Egill Jónsson
Egill Jónsson hafði í nógu að snúast á miðju Víkings Ólafsvíkur þegar liðið gerði 2-2 jafntefli við Fjölni í Pepsi deild karla í kvöld.
„Þetta var hörkuleikur frá A-Ö og mikil barátta hjá báðum liðum. Það er sjaldan sem maður er ósáttur með eitt stig eftir að hafa verið einum færri í sextíu mínútur en miðað við hvernig þetta spilaðist hefði verið fínt að taka þrjú stig. Maður er bara stoltur af liðinu og baráttunni í dag," segir Egill.
Emir Dokara fékk beint rautt spjald undir lok fyrri hálfleiks og var Egill ekki sáttur með þann dóm.
„Ég sá þetta nokkuð vel og mér finnst Emir bara vera að hugsa um boltann. Þetta er bara návígi um lausan bolta og ég get ekki séð hvernig þetta er rautt spjald. Ég þarf samt að horfa á þetta aftur."
Ólafsvíkingum hafði gengið afar illa þegar kom að leiknum í kvöld og hafa þeir að undanförnu sogast niður í fallbaráttu. Egill segir liðið gera sér grein fyrir því hvað þarf til að halda liðinu uppi.
„Við erum allir rosalega góðir vinir hérna, innan sem utan vallar. Við töluðum saman og við viljum leggjast á eitt og ætlum að berjast fyrir þessu. Þetta snýst ekki um einhvern flottan fótbolta heldur að berjast fyrir hvern annan," segir Egill.
Viðtalið í heild sinni má sjá í spilaranum hér fyrir ofan.
Athugasemdir
