Joey Gibbs var á skotskónum í dag
Ástralinn Joey Gibbs heldur áfram að raða inn mörkum fyrir Keflavík í Lengjudeildinni en framherjinn sterki skoraði tvö mörk er Keflavík lagði Þrótt 4-2 á Nettóvellinum fyrr í dag. Að loknum 16 leikjum hjá Keflavík er Joey kominn með 20 mörk og stefnir hraðbyri að því að verða markakóngur Lengjudeildarinnar þetta sumarið.
Lestu um leikinn: Keflavík 4 - 2 Þróttur R.
„Tilfinningin er góð. Mér fannst við byrja vel í dag og vorum bara nokkuð góðir í krefjandi aðstæðum . Ég hef ekki spilað í svona vindi áður en við gerðum vel að halda boltanum niðri og verðskuldum að vera í þeirri stöðu sem við erum í.“
Sagði Joey við fréttaritara eftir leikinn en sigurinn fleytir Keflvíkingum í toppsætið í það minnsta um stundarsakir.
Eins og áður segir er Joey kominn með alls 20 mörk í deildinni það sem af er tímabils og enn 6 leikir eftir. Hversu mörg mörk stefnir hann á að skora?
„Ég hugsa lítið út í það. Ég held að það hjálpi ekkert til við markaskorun, þú ferð bara út og reynir að koma þér í góðar stöður. Og ég hef verið heppinn að fá að fá frábæra þjónustu frá strákunum og ég einbeiti mér bara að því að koma mér í góðar stöður og það er að virka.“
Joey fékk frábært tækifæri til þess að skora þrennu í leiknum en Franko Lalic markvörður Þróttar sá við honum og varði vítaspyrnu Joey á 66. mínútu leiksins.
„Verð að gefa markmanninum hrós þar hann gerði vel. Ég ætlaði reyndar að skjóta annað en þetta er bara einn af þessum hlutum .“
Sagði Joey en allt viðtalið má sjá hér að ofan.
Athugasemdir
