Góðar fréttir af Kára. Hér er hann á æfingunni í dag.
Kári Árnason, miðvörður íslenska landsliðsins, hefur ekkert spilað með sínu félagsliði í mars vegna meiðsla en hann er klár í slaginn fyrir landsleikinn mikilvæga gegn Kosóvó á föstudaginn.
„Ég var að spara mig svolítið svo ég myndi ekki fá högg á þetta með félagsliði mínu. Ég forðaðist það að fara í „contact" en nú er ég kominn í stand og líður bara vel," segir Kári sem hefur getað æft á fullu með Íslandi í Parma.
Kári segir að leikurinn gegn Kosóvó hafi verið í huga sér allan tímann sem hann var að jafna sig á meiðslunum.
„Að sjálfsögðu. Þetta er gríðarlega mikilvægur leikur fyrir okkur og taflan sýnir það að við megum ekki tapa stigum. Ef allt fer á besta veg getum við verið í mjög góðri stöðu fyrir þennan leik."
Arnar Bill Gunnarsson, fræðslustjóri KSÍ, hefur leikgreint lið Kosóvó fyrir Heimi Hallgrímsson og hélt hann fyrirlestur fyrir íslenska hópinn í gær. Við spurðum Kára að því hverju varnarmenn Íslands séu að fara að mæta á föstudaginn?
„Þeir eru með tvo mjög spræka, einn stóran „striker" og annan minni sem spilar í Austurríki. Það er engin ástæða fyrir okkur að fara að vanmeta þetta lið. Ofan á allt er þetta erfiður útivöllur sem við erum að fara á."
Viðtalið við Kára má sjá í heild í sjónvarpinu hér að ofan þar sem Kári tjáir sig meðal annars um Omonia, lið sitt í Kýpur, og heita stuðningsmenn í landinu.
Fótbolti.net er með öflugt teymi í Hollandi og er hægt að fylgjast með öllu bak við tjöldin á Snapchat (Fotboltinet), á Instagram og öðrum samskiptamiðlum okkar.
Leikir Íslands á EM:
Ísland 0-1 Frakkland
Ísland 1-2 Sviss
Ísland 0-3 Austurríki
Athugasemdir
