Arnór Ingvi á landsliðsæfingu í gær.
„Maður er enn að ná tímamismuninum en þetta er mjög gaman," sagði Arnór Ingvi Traustason við Fótbolta.net í gær en hann er með landsliðinu í Bandaríkjunum þar sem liðið mætir Mexíkó og Perú á næstu dögum.
„Ég hef ekki spilað við lið úr þesari heimsálfu áður og það verður bara gaman. Þeir spila öðruvísi, eru blóðheitir og pressa hátt og út um allan völl. Það verður gott fyrir undirbúninginn fyrir HM að fá að spila á móti Suður Ameríkuþjóð núna og að spila á móti Gana í júní."
Arnór Ingvi er að fara inn í sitt fyrsta tímabil með Malmö í Svíþjóð og skoraði í bikarleik gegn Östersund um daginn.
„Ég er búinn að byrja síðustu tvo leiki eftir meiðsli og búinn að leggja upp og skora. Ég er mjög ánægður og ætla bara að byggja ofan á það. Ég ætla mér að vera byrjunarliðsmaður, það er alveg klárt."
„Mér líkar mjög vel í Svíþjóð, ég var þarna áður í tvö og hálft ár og líkaði mjög vel við fólkið og tungumálið. Mér líður eins og ég sé heima. Ég vil fá stöðugleika í ferilinn minn og byggja mig aftur upp. Svo læt ég til skarar skríða aftur, ég vil ná lengra og sjá hvert ég kemst. Þetta er ekkert endastöð hjá mér."
Athugasemdir
