Landsliðsmaður í frægu liði Júgóslavíu
Fótbolti.net ræddi við Arnar í dag og spurði hann út í sinn gamla þjálfara.

„Ég man vel eftir honum, þetta var goðsögn hjá Sochaux, búinn að spila með liðinu árin á undan. Hann var toppleikmaður og spilaði með landsliði Júgóslavíu, hluti af frægu liði sem fór á HM á Ítalíu 1990, frábær leikmaður," sagði Arnar.

„Hann fékk þetta gigg hjá Sochaux eftir að aðalþjálfarinn þá, sem fékk mig til liðsins, var rekinn. Hann var flottur í alla staði, nagli. En ég var eiginlega meiddur allan tímann hjá honum, mestmegnis - mikill sjokker," sagði Arnar og hló. „En ég náði þó að spila einhverja leiki og hef ekkert nema gott um hann að segja."

Hvernig var leikstíll liðsins? „Menn vissu ekki á þessum tíma hvað possession, xG og öll þessi tölfræði var á þessum tíma. Sochaux var frekar sóknarsinnað lið en ég man ekki hvort það var hægt að titla okkur sem eitthvað possession-lið (sem hélt vel í boltann) eða svoleiðis."

„Ég man að það var mikil virðing borin fyrir honum út af hans stöðu innan félagsins sem fyrrum leikmaður. Hann var svo látinn fara tímabilið eftir að hann fór upp með liðið í efstu deild (1998)."

Manstu eftir einhverjum samskiptum milli ykkar tveggja? „Hann var svekktur fyrir mína hönd, að vera alltaf meiddur. Hann var eins og þjálfarar almennt eru í garð meiddra leikmanna. Þeir sýna þeim smá lit og áhuga en eru að hugsa um sín lið. Bara flottur gaur."

Úr frönsku B-deildinni í ensku úrvalsdeildina á tveimur mánuðum
Arnar fór frá Sochaux árið 1997, hver var ástæðan fyrir því? „Ég átti eitt og hálft ár eftir af samningi, var búinn að vera meiddur og fór fram á að rifta samningi - sem þeir voru hrikalega ánægðir með að ég skildi gera," sagði Arnar og hló. „Þá kem ég heim (í ÍA) og ætlaði að spila það sumar á Íslandi. Ég enda á að spila bara tvo leiki, fer þá á reynslu til Bolton og fæ samning sinn. Úr því að vera hálfmeiddur og vera bara hent í burtu frá Frakklandi í B-deildinni þá er ég kominn í ensku úrvalsdeildina tveimur mánuðum seinna. Þetta heppnaðist því mjög vel."

Fyrirliði og sterk nærvera
Hefuru frá þessum tíma aftur heyrt nafnið Hadzibegic? „Svona einstaka sinnum, en fyrst af alvöru núna síðustu daga í aðdraganda leiksins. Maður missti smá 'track' af honum en um leið og við drógumst á móti þeim og hann tók við þá var þetta svona: „Já þessi gaur". Því eldri sem maður verður þá verða alltaf fleiri og fleiri svona gaurar sem maður kynntist sem poppa upp. Það er extra krydd að sjá kallinn aftur, núna sem þjálfara andstæðinga Íslands."

„Þetta er mikill karakter, mikill leiðtogi - var fyrirliði landsliðsins á sínum tíma og maður fann að hann var með sterka nærveru."

Kannski er það einkennandi bara fyrir England, svona Manager-týpa, var hann svoleiðis eða þjálfari? „Hann var þjálfari, var ekki svona enskur manager eins og var stundum á þessum tíma. Hann var mikið 'hands-on'."

Víkingar á gönguskíði?
Manstu eftir einhverri æfingu á þessum tíma?

Arnar tók sér smá tíma til að hugsa sig um áður en svarið kom til hans. „Ég man að hann hafði miklar mætur á mér sem leikmanni, var alltaf að bíða eftir að ég yrði heill heilsu."

„Ég man eftir því þegar það var vetrarfrí þá fórum við upp í fjöll, mér fannst það óvenjulegt. En það stendur upp úr að fara upp í fjöll í æfingabúðir. Það var enginn fótbolti, vorum bara á gönguskíðum. Það var mjög áhugavert. Þetta var á hans fyrsta tímabili og þetta var svolítið kúl, eitthvað sem ég hafði aldrei lent í áður. Spurning um að taka Víkingana þangað næsta vetur, upp í Pýreneafjöllin og taka gönguskíðin þar," sagði Arnar og hló.

Þá drullastu bara til að læra tungumálið
Saga Íslendinga í franska boltanum er ekki mjög björt, það er kannski helst Albert Guðmundsson eldri sem gerði flotta hluti þar. Oft hefur tungumálið verið nefnt sem ein af ástæðunum fyrir því að illa gangi hjá Íslendingum.

Fannstu að það var krafa á að þú kynnir tungumálið? „Það var svo sem engin krafa frá félaginu. Ég var þarna búin að vera í Hollandi og Þýskalandi. Þegar þú býrð í einhverju landi þá drullastu bara til að læra tungumálið, þetta var bara krafa frá mér sjálfum. Mig langaði að gera það, vildi ekki bara vera heimskur fótboltamaður heldur læra líka hvað væri að gerast í landinu þar sem þú ert gestur í ef svo má segja."

„Mér finnst það karaktereinkenni ef leikmaður vill ekki læra tungumál. Kannski annað ef þú ert að fara til Kína í eitt ár, það er gefið að það er erfitt, en ef þú skrifar undir þriggja og hálfs árs samning við lið í Frakklandi þá læriru tungumálið."

„Mig minnir að félagið hafi verið ánægt með að ég hafði frumkvæðið að því að fá frönsku kennslu frekar en að það var krafa frá því að læra tungumálið. Sama í Hollandi og Þýskalandi," sagði Arnar að lokum.

Faruk hefur á sínum ferli þjálfað í Frakklandi, Spáni, Tyrklandi, Serbíu, Alsír og landslið Svartfjallalands. Þetta er í annað sinn sem hann þjálfar landslið Bosníu-Hersegóvínu, hann þjálfaði liðið einnig árið 1999.

Leikurinn annað kvöld hefst klukkan 19:45 og verður í beinni textalýsingu á Fótbolta.net.