Kristrún Ýr Holm
Keflavík vann 1-0 baráttusigur á liði Selfoss í Keflavík í kvöld þegar liðin mættust í Reykjanesbæ fyrr í kvöld. Sigurinn markaði enda á tveggja leikja taphrinu Keflavíkur og það var að vonum að fyrirliði liðsins Kristrún Ýr Holm væri ánægð þegar hún mætti í viðtal við fréttaritara Fótbolta.net að leik loknum.
Lestu um leikinn: Keflavík 1 - 0 Selfoss
„Heldur betur, ekkert smá sterkur sigur og mjög kærkomið eftir síðustu tvo leiki.“ Sagði Kristún um sigurinn og þá staðreynd að hún var ögn upplitsdjarfari í kvöld en síðast þegar fréttaritari ræddi við hana eftir erfitt tap gegn Breiðablik.
Skipulag Keflavíkur í leiknum var til fyrirmyndar leikinn á enda og man fréttaritari ekki til þess að lið Selfoss hafi ógnað vörn Keflavíkur eða markinu að nokkru ráði í leiiknum.
„Ég man ekki eftir færi sem að þær fengu. Við vissulega vorum mjög skipulagðar en það sem ég er ánægðust með er að við héldum boltanum. Við vorum yfirvegaðar á boltann og vildum spila honum og vorum ekki að þvinga honum fram.“
Næst á dagskrá hjá Keflavíkurliðinu er bikarslagur gegn Þór/KA næstkomandi laugardag. Þar fær liðið loks að leika á eiginlegum heimavelli sínum HS Orkuvellinum en til þessa hefur liðið leikið á gervigrasvellinum við hlið Nettóhallarinnar í Reykjanesbæ. Um það að komast loks “heim” sagði Kristrún.
„Okkur er reyndar farið að þykja svolítið vænt um þennan völl en það verður mjög gott að komast loksins á aðalvöllinn“
Sagði Kristrún en allt viðtalið má sjá hér að ofan.
Athugasemdir
