Dagný Brynjarsdóttir kom inn af bekknum í uppbótartíma er West Ham United lagði Tottenham að velli 2-0 í efstu deild enska kvennaboltans í dag.
Þetta er góður sigur fyrir West Ham sem siglir lygnan sjó í neðri hluta deildarinnar, með 18 stig eftir 17 umferðir.
Hlín Eiríksdóttir var þá ónotaður varamaður er Leicester vann afar dýrmætan sigur gegn sterku liði Brighton. Leicester komst í þriggja marka forystu og urðu lokatölur 3-2.
María Þórisdóttir var í byrjunarliði Brighton en tókst ekki að koma í veg fyrir tap.
Leicester er sex stigum frá fallsætinu eftir þennan sigur, með 15 stig. Brighton er í fimmta sæti með 22 stig.
Englandsmeistarar Chelsea unnu þá útileik gegn Manchester City, en liðin mætast einnig í Meistaradeild Evrópu þessa dagana.
Karolin skoraði eina mark fyrri hálfleiksins og leiddu heimakonur í Manchester í leikhlé en Chelsea skipti um gír í síðari hálfleik. Meistararnir voru talsvert sterkari aðilinn og sköpuðu sér mikið af færum, sem skiluðu sér loks með sigurmarki á 91. mínútu eftir ítrekaðar tilraunir. Chelsea er með átta stiga forystu eftir þennan sigur. Stórveldið er enn taplaust í deildinni.
Manchester United vann þá þægilegan fjögurra marka sigur á útivelli gegn Aston Villa. Man Utd er í harðri baráttu við Arsenal um 2. sæti deildarinnar, þar sem liðin eru jöfn með 39 stig eftir 17 umferðir.
Man City 1 - 2 Chelsea
1-0 Karolin ('32)
1-1 Agnes Beever-Jones ('49)
1-2 Erin Cuthbert ('91)
Aston Villa 0 - 4 Man Utd
0-1 Elisabeth Terland ('22)
0-2 Elisabeth Terland ('31)
0-3 Grace Clinton ('45)
0-4 Leah Galton ('65)
West Ham 2 - 0 Tottenham
Leicester 3 - 2 Brighton
Athugasemdir
