Dregið var í 32-liða úrslit Mjólkurbikarsins í höfuðstöðvum KSÍ í dag. Víkingur R. mætir 4. deildar liði KÁ.

„Þetta er varalið Hauka skilst mér og við erum Pepsi Max lið þannig að við eigum að klára þennan leik. Þetta er fínn dráttur fyrir okkur. Við vorum líka heppnir með drætti í fyrra," segir Sölvi Geir Ottesen, varnarmaður Víkings.

Víkingur R. mætir á Origo völlinn að Hlíðarenda á föstudagskvöldið þegar liðið mætir Val í opnunarleik Pepsi Max-deildarinnar.

„Þetta er bara gífurlega stórt próf fyrir okkur og bara gaman af því. Við erum spenntir og gíraðir fyrir þann leik. Okkur finnst við hafa verið að spila betur og við komum fullir sjálfstrausts inn í þennan leik."

Sölvi hefur verið að glíma við meiðsli á undirbúningstímabilinu og því lítið getað tekið þátt.

„Ég er búinn að æfa í tæpan mánuð og það er alveg nóg. Maður er búinn að vera svo lengi í þessu, það er aðallega hausinn sem þarf að vera fljótur að hugsa. Standið er fínt. Ég er búinn að spila þrjá æfingaleiki á þremur vikum. Þetta gengur vel."

Víkingum er spáð 11. sæti deildarinnar af sérfræðingum Fótbolta.net og þar með falli.

„Við ætlum okkur alls ekki að falla. Okkur var líka spáð falli í fyrra og þetta hefur ekkert að segja fyrir okkur. Við erum með ákveðin markmið og ætlum að halda okkur við þau."

Viðtalið við Sölva Geir má sjá í heild sinni hér að ofan.

Tweet

Senda a Facebook Hafdu samband Senda frétt Prenta frétt Frétta leit