FIFA listinn yfir bestu fótboltalandslið í karlaflokki hefur verið uppfærður eftir landsleikjahlé og stendur Ísland í stað í 67. sæti listans, eftir tap gegn Lúxemborg og sigur gegn Bosníu.
Það eru engar breytingar á tíu efstu sætum listans þar sem heimsmeistarar Argentínu tróna á toppinum, með Frakkland, Brasilíu, England og Belgíu í næstu sætum fyrir neðan.
Króatía, Holland, Ítalía, Portúgal og Spánn fullkomna svo topp tíu listann, en Þýskaland er dottið niður í fimmtánda sæti. Þjóðverjar eru þar með komnir niðurfyrir Bandaríkin, Mexíkó, Sviss og Marokkó.
Frændur okkar frá Danmörku eru efstir Norðurlandaþjóðanna í 19. sæti en svo koma Svíar í 23. sæti, einu sæti fyrir ofan Úkraínu.
Noregur er í 44. sæti, Finnland vermir 55. sætið og eru Færeyjar að lokum í 129. sæti.
Íslenska karlalandsliðið hefur hæst verið á 18. sæti heimslistans og neðst í 131. sæti. Frá upphafi útgáfu listans er meðalstaða Íslands á heimslistanum 64. sæti.
