Danski landsliðsmarkvörðurinn Kasper Schmeichel er einn af fimm leikmönnum sem fá tilnefningu sem besti markvörður heims af alþjóðafótboltasambandinu, FIFA.
Schmeichel átti frábært Evrópumótið með Dönum sem komust í undanúrslit og þá vann hann enska bikarinn með Leicester City á síðustu leiktíð.
Danir eru þá búnir að tryggja sér sæti á HM í Katar en liðið tapaði aðeins einum leik í undankeppninni.
Alisson Becker, markvörður Liverpool, er einnig á listanum. Hann hjálpaði Liverpool að ná þriðja sæti ensku úrvalsdeildarinnar og kom Brasilíu í úrslitaleik Suður-Ameríkubikarsins.
Gianluigi Donnarumma er þarna fyrir magnaðan árangur með ítalska landsliðinu á Evrópumótinu í sumar. Edouard Mendy, markvörður Chelsea, vann Meistaradeild Evrópu og þykir afar líklegur til að hreppa verðlaunin og Manuel Neuer fyrir árangurinn með Bayern München.
Verðlaunin verða afhent þann 17, janúar í höfuðstöðvum FIFA í Zürich.
Athugasemdir