Elmar Atli Garðarsson

Mynd: Fótbolti.net - Hafliði Breiðfjörð

Einn leikur fór fram í Lengjudeildinni í dag. Vestri og Grindavík mættust á Ísafirði.

Gestirnir komust yfir með klaufalegu marki. Tómas Leó Ásgeirsson nýtti sér mistök Pétur Bjarnasonar. 

„Grindavík eru komnir yfir! Pétur Bjarnason skellir sér í tæklingu á miðjum vallarhelmingi Vestra og fer ekki betur en svo að hann tæklar hann beint í gegn á Tómas sem klárar vel niðri í fjær." Skrifaði Jón Ólafur Eiríksson í textalýsinguna.

Vestri var sterkari í fyrri hálfleiknum en marki undir þegar hálfleiksflautið gall.

Eftir tæplega klukkutíma leik náði Vestri að jafna metin en þar var að verki Martin Montipo sem fylgdi á eftir skoti Christian Jiménez Rodríguez sem Aron Dagur í marki Grindavíkur varði.

Elmar Atli Garðarsson tryggði síðan heimamönnum sigurinn af miklu harðfylgi. Virkilega sterkur sigur Vestra sem hoppa úr 9. sæti í það sjötta, einu stigi á eftir Grindvíkingum.