„Gríðarlega svekkjandi. Við vorum yfir þegar við misstum mann út af. Við gerðum það sem við gátum einum færri og enduðum á að ná í punkt," sagði Dagur Örn Fjeldsted, leikmaður HK, eftir jafntefli gegn KA á Akureyri í dag.
Lestu um leikinn: KA 3 - 3 HK
Dagur skoraði sitt fyrsta mark fyrir félagið þegar hann jafnaði metin í 1-1 með frábæru skoti.
„Birnir leggur hann út á mig og ég þarf að taka hann í fyrsta og klíni honum í skeytin. Fyrsta markið mitt í HK, bara geggjað," sagði Dagur.
Dagur var ánægður með leik liðsins í seinni hálfleik manni færri.
„Auðvitað er erfitt að vera einum færri en við reyndum að beita skyndisóknum og nýta það sem við fengum. Við fengum á okkur leiðinleg mörk en það er bara partur af þessu svo nýttum við sénsinin í lokin," sagði Dagur.
Hann er ánægður með lífið í HK.
„Það er geggjað, geggjaðir gæjar í liðinu og stuðningsmenn. Það er geggjað að fá að spila," sagði Dagur en hann er á láni frá grönnunum í Breiðabliki en hann þurfti að sitja upp í stúku þegar liðin mættust í síðustu umferð.
