Leikstíll Sarri hefur oft verið kallaður „Sarri-ball" en hann er afar sóknarþenkjandi og fengu stuðningsmenn Napoli að kynnast því frá 2015 til 2018.

Liðið endaði þrisvar í 2. sæti ítölsku deildarinnar og tók hann leikstílinn með sér til Chelsea. Hann hefur hins vegar þurft að aðlagast öðruvísi leikstíl hjá Juventus. Liðið er enn taplaust í Seríu A en liðið hefur unnið ellefu leiki og gert tvö jafntefli.

„Ég var skilgreindur sem talíbani vegna þess að ég vildi alltaf spila minn leikstíl og nú er það ekki nógu gott fyrir þá því ég þarf að aðlagast að þessum ólíku karakterum sem ég er með í leikmönnunum mínum," sagði Sarri fyrir leikinn gegn Atlético Madríd.

„Ef ég hefði hlustað eða lesið á allt sem hefur verið sagt um Juventus þá yrði ég geðveikur. Ég vinn bara mína vinnu. Ég vil auðvitað halda sem mestu jafnvægi á liðinu og með ákveðið viðhorf í huga en maður verður að taka það inn í myndina þessa ólíku karaktera," sagði hann ennfremur.