Frans lyftir bikarnum í leikslok
Frans Elvarsson átti skínandi leik í liði Keflavíkur þegar liðið tryggði sér sæti í Bestu deildinni með 4-0 sigri á HK í úrslitaleik umspils Lengjuldeildarinnar á Laugardalsvelli í dag. Frans var til viðtals við Fótbolta.net í fögnuðinum og var að vonum kátur með daginn.
Lestu um leikinn: Keflavík 4 - 0 HK
„Ég er bara gífurlega glaður. Við erum komnir á þann stað sem við viljum vera á og frammistaðan í dag bara góð.“
Frans sem hokinn er af reynslu og hefur marga fjöruna sopið með Keflavík undanfarin ár og séð margt var að lyfta bikar og vinna úrslitaleik á Laugardalsvelli með Keflavík. Hvar setur hann þetta í röðina á sætustu sigrunum?
„Ég myndi segja að þetta sé ofarlega. Það er alltaf gaman að koma hingað á Laugardalsvöll en ég hef spilað tvo úrslitaleiki hér áður en alltaf tapað þeim svo það er gaman að loksins vinna á þessum velli.“
Frans átti sem fyrr segir góðan leik í liði Keflavíkur. Hann skoraði gott mark í leiknum en fagn hans er þó öllu eftirminnilegra þegar hann fór í handahlaupum á vellinum. Íþróttakennarinn Frans í essinu sínu þar.
„Já heldur betur, maður verður að sýna að maður kunni eitthvað. Maður var í fimleikum í gamla daga og þetta er bara gaman.“
Um sína framtíð og hvort hinn 35 ára gamli Frans muni taka slaginn með Keflavík að ári í Bestu deildinni sagði Frans.
„Ég er bara að hugsa málið. Ég hef samt haft það mottó að ef maður getur eitthvað og er ekki meiddur og hefur áhuga á þessu þá reynir maður að halda sér í þessu eins lengi og maður getur. Ef að konan leyfir manni. “
Sagði Frans en allt viðtalið við hann má sjá hér að ofan.
