Umboðsmaður brasilíska leikmannsins Estevao Willian hefur ýjað að því að Chelsea-maðurinn muni einn dag ganga í raðir Barcelona á Spáni.
Estevao er 18 ára gamall og einn mest spennandi fótboltamaður heims um þessar mundir.
Hann kom til Chelsea frá Palmeiras í sumar og fundið sig vel hjá enska félaginu.
Í gær skoraði hann eitt af mörkum liðsins í 3-0 sigrinum á Börsungum, en Andre Cury, umboðsmaður kappans, gaf sterklega til kynna að brasilíski landsliðsmaðurinn vilji fara til Barcelona á næstu árum.
„Við töluðum við Barca um Estevao árið 2021, 2022, 2023 og 2024. Við fórum í höfuðstöðvar þeirra til að bjóða þeim leikmanninn því ég var handviss um að framtíð hans yrði frábær í heimsboltanum, en fjármál Barcelona eru í ólagi og því erfitt að ganga frá samkomulagi. Það er sorglegt, en svona er þetta í fótbolta. Allt fólkið hjá Barcelona gaf grænt ljós á kaupin á Estevao, en Deco gat það ekki vegna fjárhag félagsins.“
„Estevao er með fimm ára samning og nýtur tímans hjá Chelsea, en hann er sérstaklega hrifinn af Barcelona,“ sagði hann í lokin.
Athugasemdir
