Lengjudeildin: Langþráður sigur er Þór rústaði Þrótti

Þór vann langþráðan sigur í Lengjudeildinni er Þróttur kom í heimsókn frá Vogum í kvöld.

Vogamenn voru þreyttir eftir erfitt ferðalag þegar mætt var til leiks eftir að fluginu þeirra hafði verið frestað vegna veðurs.

Þórsarar voru ekki á neinu ferðalagi heldur tóku þeir vel á móti gestum sínum og gjörsamlega rúlluðu yfir þá. Alexander Már Þorláksson átti draumabyrjun á Akureyri eftir að hafa komið að láni frá Fram á dögunum. Hann skoraði og lagði upp á fyrstu tíu mínútum leiksins og staðan strax orðin þægileg.

Harley Willard gerði þriðja mark Þórsara úr vítaspyrnu og bætti síðan því fjórða við skömmu eftir leikhlé. 

Bjarni Guðjón Brynjólfsson gerði fimmta og síðasta mark leiksins á lokakaflanum og ótrúlega þægilegur sigur Þórsara staðreynd.

Þetta var fyrsti sigur Þórs í deildinni síðan gegn Kórdrengjum í fyrstu umferð og er liðið með átta stig eftir níu umferðir. Þróttur vermir áfram botnsætið með tvö stig.