Agla María skorar sigurmarkið gegn Val. Hennar fjórtánda deildarmark í sumar!
„Þetta var rosalega erfiður leikur. Við vorum að hlaupa ótrúlega mikið. En að vinna svona leik. Þetta er bara eins og að vinna bikarúrslitaleik, tilfinningin er þannig," sagði Agla María Albertsdóttir, leikmaður Breiðabliks, eftir 1-0 útisigur í stórleiknum gegn Val.
Lestu um leikinn: Valur 0 - 1 Breiðablik
„Við vorum frekar þéttar og þetta var bara barátta. Þetta var þannig leikur að sigurinn hefði getað dottið hvoru megin sem er," sagði Agla María um leikinn en það var hún sem skoraði markið sem skildi liðin að í kvöld.
„Ég hugsaði bara um að reyna að setja boltann niðri í nærhornið og það virkaði. Ég var svolítið lengi en það kom engin í mig svo ég náði að leggj'ann," sagði markaskorarinn um markið. Þetta var hennar 14 mark í deildinni í sumar og hún er nú markahæst í deildinni ásamst liðsfélaga sínum, Sveindísi Jane.
Öglu Maríu finnst ekki tímabært að tala um að titillinn sé kominn í Kópavoginn en viðurkennir að sigurinn komi liðinu í mjög góða stöðu.
„Það kemur okkur í mjög góða stöðu að vinna þennan leik. Það skiptir okkur máli uppá framhaldið."
Nánar er rætt við sóknarmanninn öfluga í spilaranum hér að ofan.
Athugasemdir
