Sigurður Ragnar Eyjólfsson
Topplið Keflavíkur tók á móti botnliði Leiknis F í Lengjudeildinni í dag en leikið var á Nettóvellinum í Keflavík. Heimamenn komust yfir snemma leiks með marki Davíðs Jóhanssonar beint úr hornspyrnu og tvöfölduðu svo forystuna þegar skammt var til leikhlés. Gestirnir bitu í skjaldarrendur í hálfleik og komu tvíelfdir til leiks í síðari hálfleik og létu Keflvíkinga hafa fyrir hlutunum. David Fernandez Hidalgo minnkaði munin á 63 mínútu leiksins en þrátt fyrir sóknarþunga tókst gestunum ekki að skapa sér fleiri afgerandi færi til þess að jafna leikinn og lokatölur 2-1 Keflavík í vil.
Lestu um leikinn: Keflavík 2 - 1 Leiknir F.
„Ég er ekki sammála því. Ef þú skoðar öll færin sem við fengum í fyrri hálfleik, þrjú sláarskot og dæmt af okkur mark og við óðum í færum. Ég veit ekki hvað Joey fékk mikið af færum og líka í seinni hálfleik svo við áttum að vera löngu búnir að klára þennan leik.“
Sagði Siggi Raggi aðspurður hvort þeir hafi ekki hreinlega sloppið vel með sigur í dag.
Keflvíkingar neyddust til þess að gera skiptingu í hálfleik þar sem Frans Elvarsson fór meiddur af velli. Við þá breytingu virtist sem svo að Keflavík missti tökin á miðsvæðinu.
„Það riðlaðist aðeins leikurinn hjá okkur á miðjunni og við þurftum að reyna finna lausnir á því. Við gefum þeim þetta mark þegar við töpum boltanum illa á miðsvæðinu þannig að það kom kannski smá óöryggi í liðið.“
Keflavík er líkt og áður sagði á toppi deildarinnar og í kjörstöðu að tryggja sér sæti í Pepsi Max deild karla að ári en kvennalið félagsins hefur þegar tryggt sér sæti meðal þeirra bestu að ári og mikill meðbyr og stuðningur við félagið í bæjarfélaginu,
„Við finnum fyrir stuðningi og það hefði verið gaman að sjá hve margir myndu koma á leikina ef það væri opið. Það hefur verið takmarkaður aðgangur í sumar og hefur orðið uppselt á á leiki hjá okkur sem er ánægjulegt. En við finnum fyrir stuðningi í bæjarfélaginu og fólkið í bænum er stolt af félaginu sínu og er með okkur í þessari baráttu svo vonandi hættir þetta covid einhvertímann svo fólk geti sýnt stuðning í verki og mætt og notið þess að horfa á frábæran fótbolta.“
Sagði Siggi Raggi en allt viðtalið má sjá hér að ofan.
Athugasemdir
