Daily Mail segir að leikmenn Manchester City hafi látið Pep Guardiola vita af óánægju sinni með sífelldar breytingar stjórans á byrjunarliði og leikaðferð.

Guardiola hefur ekki haldið sig við sama byrjunarlið tvo leiki í röð á þessu tímabili og hefur mikið verið að hringla í leikkerfinu síðan Mikel Arteta hætti sem aðstoðarmaður.

Guardiola er sagður hafa kallað eftir uppástungum frá leikmönnum um hvar hægt væri að gera betur. City er nú 22 stigum á eftir toppliði Liverpool.

Guardiola hefur gert 76 breytingar á liði sínu í ensku úrvalsdeildinni á þessu tímabili. Frank Lampard er í öðru sæti á þeim lista með 60 breytingar en Jurgen Klopp hefur framkvæmt 46 breytingar.

Síðar í þessum mánuði mun City leika gegn Real Madrid í 16-liða úrslitum Meistaradeildar Evrópu.

Sagt er að einhverjir leikmenn City hafi kvartað yfir þessum sífelldu breytingum þegar málin voru rædd í klefanum eftir 2-0 tapið gegn Tottenham á sunnudag.