Sassuolo vann dramatískan 3-2 sigur á nýliðum Cremonese í Seríu A á Ítalíu í kvöld en sigurmarkið kom á annarri mínútu í uppbótartíma síðari hálfleiks.

Franski vængmaðurinn Armand Lauriente kom Sassuolo yfir á 26. mínútu með marki úr aukaspyrnu áður en Davide Frattesi bætti við öðru fyrir leikhlé.

Cyriel Dessers minnkaði muninn fyrir Cremonese á 62. mínútu og náði síðan að jafna metin þegar sjö mínútur voru eftir af venjulegum leiktíma.

Gestirnir fengu á sig svekkjandi mark á annarri mínútu í uppbótartíma er Nedim Bajrami kom fyrirgjöf Lauriente í netið og lokatölur því 3-2 Sassuolo í vil. Sassuolo er í 13. sæti með 30 stig en Cremonese í næst neðsta sæti með 12 stig.