Guðmundur á fundi landsliðsins í dag.
Ingvar Jónsson, Ögmundur Kristinsson og Frederik Schram eru þeir markverðir sem valdir voru fyrir landsliðsverkefnin framundan. Ísland mætir Póllandi og Slóvakíu í vináttuleikjum 12. og 17. nóvember en báðir leikirnir eru ytra.
Frederik Schram er ungur markvörður sem hefur spilað með U21-landsliðinu og staðið sig vel. Fótbolti.net ræddi við Guðmund Hreiðarsson, markmannsþjálfara, þegar hópurinn var tilkynntur í dag.
„Hann og Rúnar Alex (Rúnarsson) voru teknir inn í U21-landsliðið 19 ára gamlir. Þá var verið að hugsa að þetta væru tveir af framtíðarmarkvörðum landsliðsins. Frederik hefur sýnt í leikjum með U21-landsliðinu að það er mikil framtíð í honum," segir Guðmundur.
Frederik er hjá Vestsjælland í Danmörku.
„Hann hefur ekki verið mikið að spila með sínu félagsliði í Danmörku en vitum að það er gríðarlegur hæfileiki þarna til staðar. Við viljum sjá hvernig hann kemur út í þessum hópi. Það er meiri hraði í A-landsliðinu en U21-landsliðinu. Við erum að horfa lengra fram í tímann."
Hannes Þór Halldórsson er meiddur en eldri leikmenn fá hvíld í komandi verkefni, þar á meðal Gunnleifur Gunnleifsson.
„Við vitum allt um Gulla. Hann er fjársjóður sem við vitum að við getum gengið að. Hann er í fínu standi og er alltaf að æfa," segir Guðmundur.
Hvernig eru markveðrirnir valdir í landsliðið, er það bara Guðmundur sem sér um það?
„Nei við höfum skemmtilega vinnureglu. Það koma allir með sínar tillögur og þær eru ræddar innbyrðis. Á endanum eru það þeir (Heimir og Lars) sem ákveða hverjir eru valdir."
Í viðtalinu sem má hlusta á hér að ofan ræðir Guðmundur um endurhæfingu Hannesar og fleira.
Athugasemdir
