Jói fagnar í leikslok.
„Mér fannst fyrri hálfleikurinn frábær, hann var næstum því fullkominn. Liðið frábært og eiginlega ekki hægt að biðja um meira, 3-0," sagði Jóhann Kristinn Gunnarsson þjálfari Þórs/KA eftir 2 - 4 útisigur á Þrótti í Bestu-deild kvenna í kvöld.
Lestu um leikinn: Þróttur R. 2 - 4 Þór/KA
„Við ræddum svo í hálfleik, og vorum heiðarleg við okkur sjálf með það, að tölfræðin segir að þegar þú ert með 3-0 forystu í hálfleik og kemur út í seinni þá tekurðu fótinn af bensíngjöfinni þó þú ætlir þér innilega ekki að gera það. Hitt liðið ætlar svo að spyrna við fótum sem þær gerðu vel. Þróttur spilaði ekki góðan fyrri hálfleik, við spiluðum frábæran fyrri hálfleik. Þróttur spilaði betur í seinni og við vorum ekki nógu góðar í seinni. Markið sem Karen skorar í seinni slær vindinn úr þeim að mestu leiti og klárar leikinn. Það var óþarfi að gefa þessi tvö mörk, ég ætla að biðja þig að spyrja ekki út í mörkin sem við fáum á okkur, þetta er einhver sirkus og mig langar ekkert að tala við það."
Þú ert greinilega ósáttur við þau?
„Já, ég er mjög ósáttur við þessi tvö mörk. Það er högg að fá á sig mörk, og högg að fá á sig mörk á ákveðinnn hátt. Við höfum verið í prógrammi undanfarið þar sem við töpum fyrir Val í blálok leiks, Breiðabliki í blálok seinni helmings framlengingar. Það er sama fílan af þessum mörkum," sagði Jói. Aðspurður hvort það væri skortur á einbeitingu sagði hann: „Eigum við ekki að segja það? Það er eitthvað svoleiðis." Eitthvað þarf að fara úrskeiðis svo einhver geti skorað mark."
Nánar er rætt við Jóa í spilaranum að ofan þar sem hann ræðir frammistöðu Söndru Maríu Jessen og Huldu Óskar Jónsdóttur og fríið sem er framundan. Hann svarar því hvort hann muni nýta fríið í að fara suður til Reykjavíkur í frí.
Athugasemdir
