Blackburn Rovers tapaði mikilvægum stigum er liðið tapaði fyrir Stoke City, 3-2, í ensku B-deildinni í kvöld.

Hollenski bakvörðurinn Ki-Jana Hoever var óvænt hetja liðsins en hann skoraði tvö mörk í fyrri hálfleiknum. Hoever er á láni frá Wolves en þetta voru fyrstu mörk hans fyrir Stoke frá því hann kom í janúar. Hann var áður á mála hjá Liverpool.

Tyrese Campbell, sem er nú töluvert vanari markaskorari en Hoever, bætti við þriðja markinu þegar fimmtán mínútur voru eftir. Ben Brereton og Sam Gallagher klóruðu í bakkann fyrir Blackburn undir lok leiks en það reyndist of seint.

Blackburn tapaði dýrmætum stigum í efri hlutanum en liðið er í 4. sæti með 58 stig, tveimur stigum á eftir Middlesbrough sem er í þriðja sætinu. Stoke er aftur á móti í 13. sæti með 46 stig.