Danmörk: Dramatískt tap hjá Hirti og félögum

Hjörtur Hermannsson lék allan leikinn í þriggja manna varnarlínu Bröndby sem tók á móti FC Kaupmannahöfn í stórleik í dönsku toppbaráttunni.

Kamil Wilczek gerði eina markið í fyrri hálfleik fyrir Kaupmannahöfn en Mikael Uhre náði að jafna fyrir Bröndby í nokkuð jöfnum leik.

Staðan var jöfn allt þar til undir lokin þegar vítaspyrna var dæmd á Hjört Hermannsson eftir að boltinn fór í hendi hans. Hjörtur fékk ekki spjald fyrir enda óviljaverk.

Wilczek klúðraði vítaspyrnunni en Mohammed Daramy fylgdi eftir með marki.

Bröndby setti þá allt í sóknina og gerði Wilczek út um viðureignina með marki úr skyndisókn undir lok uppbótartímans.

Þetta tap er gríðarlega mikill skellur fyrir Bröndby. Liðið var í frábærri stöðu til að hirða danska titilinn en er núna búið að tapa tveimur leikjum í röð.

Bröndby er því í öðru sæti, einu stigi eftir toppliði Midtjylland sem á leik til góða.