Albert Guðmundsson á æfingu í Rússlandi.
Emil, Jón Daði og Albert á æfingu.
„Það er mjög fínt, rólegt en skemmtilegt. Það er meiri fókus á verkefnið hérna en heima. Það var meira áreiti heima á Íslandi. Það er allt til alls hérna, starfsmennirnir eru að gera allt til þess að maður sjálfur þurfi ekki að gera handtak," sagði Albert Guðmundsson, leikmaður PSV Eindhoven og íslenska landsliðsins fyrir æfingu í Gelendzhik í morgun.
„Þetta kikkar líklega allt inn þegar maður mætir í fyrsta leikinn. Ég hef alveg hugsað mér hvernig þetta er allt saman. Þetta verður augljóslega mjög stórt en þetta verður bara mjög gaman," sagði Albert sem segir undirbúninginn fyrir leikinn gegn Argentínu vera í fullum gangi.
Ísland mætir Argentínu á laugardaginn næstkomandi klukkan 13:00 á íslenskum tíma.
„Við erum vel undirbúnir og á næstu 3-4 dögum undirbúum við okkur enn betur. Við höfum allir séð þessa leikmenn spila í stærstu deildum í Evrópu og það teljum að það sé auðveldara fyrir okkur að leikgreina þá, en þeir okkur."
„Þeir eru með heimsklassa leikmenn í nánast öllum stöðum. Það verður erfitt að stöðva þá en það er ekkert ómögulegt," sagði Albert en eru Argentína með lið sem getur orðið Heimsmeistarar?
„Þess vegna, en ég myndi líka segja það um okkur ef þú myndir spyrja."
Það lá því beinast við að spyrja Albert, getur Ísland orðið Heimsmeistarar?
„Gjörsamlega," sagði Albert og brosti.
„Ég ætla gefa mér vonir um að fá að spila í öllum leikjunum, svo ég verði á tánnum og verði klár. Frekar en að vera ekki að búast við neinu og vera ekki klár. Ég ætla að vera klár þegar kallið kemur.
Athugasemdir
