---

7. Álftanes 63 stig
Sæti í fyrra: 8. sæti í 3. deild
Álftnesingar voru í fallhættu á tímabili í fyrra en enduðu á að ná besta árangri í sögu sinni. Stígandi hefur verið á Álftanesi undanfarin ár og stemningin í kringum liðið er góð. Stefnt er á áframhaldandi uppbyggingu á næstu árum. Ungir leikmenn úr Stjörnunni hafa komið í Álftanes og það er samstarf sem bæði félög njóta góðs af. Baldvin Sturluson og Arnar Már Björgvinsson stýra liðinu saman líkt og í fyrra.
Lykilmenn: Brandon Wellington, Hörður Fannar Björgvinsson og Snorri Páll Blöndal.
Þjálfarinn segir - Baldvin Sturluson
„Spáin kemur mér ekki á óvart þetta er í takt við okkar gengi síðasta sumar. Í fyrrasumar náðum við besta árangri í sögu félagsins og við ætlum að halda áfram að byggja ofan á þann árangur. Hópurinn okkar er breiður og ef menn halda rétt á spilunum eigum við að geta strítt stærstu liðunum í þessari deild. Deildin verður held ég mun jafnari en í fyrra þar sem 3-4 lið stungu af. Ég á ekki von á því að hópurinn okkar breytist neitt fyrir mót."

8. Einherji 55 stig
Sæti í fyrra: 7. sæti í 3. deild
Einherji hefur haldið velli í 3. deildinni undanfarin ár og fest sig vel í sessi. Búlgarski sóknarmaðurinn Todor Hristov hefur raðað inn mörkum í 3. deildinni undanfarin ár og hann verður áfram í lykilhlutverki. Ben King og Recoe Martin komu frá Englandi á dögunum og spennandi verður að sjá þá í appelsínugulu treyjunni í sumar. Martin var kallaður hinn „nýi Dele Alli" og orðaður við bæði Newcastle og Southampton fyrir tveimur árum síðan. Heimavöllurinn hefur gefið Einherja mjög mikið í gegnum tíðina en Vopnfirðingar unnu einungis tvisvar heima í fyrra. Heimavöllurinn verður að gefa meira í ár. Englendingurinn Ashley CIvil tók við Einherja í vetur en hann hefur þrátt fyrir ungan aldur þjálfað í Kína, Nígeríu, Bandaríkjunum, Tælandi auk heimalandsins.
Lykilmenn: Ben King, Recoe Martin, Todor Hristov.
Þjálfarinn segir - Ashley Civil
„Ég er ánægður með að okkur sé spáð þarna, fólk veit ekki mikið um mig eða okkar hóp og vonandi getum við komið á óvart. Við erum með þéttan hóp og allir vilja leggja hart að sér og sýna góða frammstöðu. Þeir leikmenn sem við höfum fengið til liðs við okkur munu vonandi ýta á þá sem fyrir voru í hópnum og bæta við gæðum. Við gætum ennþá bætt við hópinn en ég er mjög ánægður með hópinn í augnablikinu."

9. Vængir Júpíters
Sæti í fyrra: 4. sæti í 3. deild
Vængirnir hafa blandað sér í toppbaráttuna í 3. deild undanfarin ár en vantað herslumuninn til að fara upp. Í fyrra fékk liðið 44 stig en það dugði ekki til að fara upp. Miklar breytingar hafa orðið á liði Vængjanna í vetur og kynslóðaskipti eru í gangi. Væntingarnar eru því minni fyrir komandi tímabil. Fyrirliðinn og vítaskyttan Hjörleifur Þórðarson er hættur sem og tvíburabræðurnir Geir og Kolbeinn Kristinssynir og Marinó Þór Jakobsson. Fleiri leikmenn sem hafa dregið vagninn undanfarin ár eru einnig horfnir á braut. Í staðinn hafa Vængirnir fengið marga nýja leikmenn í sínar raðir og leikmannahópurinn er orðinn yngri en áður en í hópnum má meðal annars finna leikmenn úr 2. flokki Fjölnis. Búi Vilhjálmur Guðmundsson þjálfar Vængina í sumar en hann tók við liðinu af Tryggva Guðmundssyni í vetur.
Lykilmenn: Gunnar Orri Guðmundsson, Arnór Daði Gunnarsson og Kristján Svanur Eymundsson.
Þjálfarinn segir - Búi Vilhjálmur Guðmundsson
„Ég held að spáin komi engum á óvart. Það eru kynslóðaskipti í Vængjum Júpiters, nánast nýtt lið frá því í fyrra og verður það undir okkur komið að sýna að við eigum heima ofar í töflunni. Okkur hefur gengið vel að manna hópinn og er hann er hann orðin vel mannaður af ungum og metnaðarfullum drengjum sem eru tilbúnir að leggja mikið á sig til að ná árangri. Markmið okkar eru klár, það er að taka 4. sætið. Vængirnir hafa tekið 4. sæti í 3.deildinni seinustu 3 tímabil."

Sjá einnig:
Spá þjálfara í 3. deild karla - 10-12. sæti