Manchester United er bikarmeistari kvenna á Englandi 2024 eftir þægilegan sigur gegn Tottenham í úrslitaleiknum sem fór fram í dag.

Man Utd var talsvert sterkari aðilinn í dag en tókst ekki að skora fyrr en í uppbótartíma fyrri hálfleiks, þegar Ella Toone kom boltanum í netið eftir undirbúning frá Lisa Naalsund.

Flóðgáttirnar opnuðust í síðari hálfleik þegar heimakonur byrjuðu að nýta færin sín betur og skoruðu þrjú mörk til að innsigla 4-0 sigur.

Rachel Williams skoraði á 54. mínútu og bætti Lucia Garcia tveimur mörkum við til að klára dæmið.

Kvennalið Man Utd er að vinna FA bikarinn í fyrsta sinn í sögu sinni, en Arsenal er sigursælasta félag keppninnar. Þetta er í annað sinn sem Man Utd fer í úrslitaleikinn, eftir að liðið tapaði gegn Chelsea í fyrra.