Franski landsliðsmaðurinn Kylian Mbappe er óvænt mættur aftur til æfinga hjá Paris Saint-Germain eftir meiðsli. Argentínski snillingurinn Lionel Messi er líka byrjaður að æfa.
Fréttaflutningur ytra hefur verið á þá vegu að útilokað væri að Mbappe gæti spilað Bayern München í fyrri leik liðanna í 16-liða úrslitum Meistaradeildarinnar.
Mbappe varð fyrir meiðslum á læri gegn Montpellier þann 1. febrúar síðastliðinn.
Það var sagt frá því fyrst að hann yrði frá í þrjár vikur og myndi missa af fyrri leiknum gegn Bayern, en það virðist vera möguleiki á því að hann geti komið við sögu á morgun. Það sama gildir um Messi sem var sagður tæpur fyrir leikinn.
Mbappe var brosandi á æfingu í morgun og tók hann einnig þátt á æfingu í gær. Það yrði stórt fyrir PSG að hafa þessar tvær stórstjörnur í liði sínu á morgun.
Athugasemdir