„Ég er ótrúlega vonsvikin en við gáfum allt í þetta og reyndum að vinna þennan leik. Það gekk bara ekki alveg upp,“ sagði Álfhildur Rósa Kjartansdóttir, fyrirliði Þróttar, eftir 2-2 jafnteflisleik gegn FH fyrr í kvöld.
Lestu um leikinn: Þróttur R. 2 - 2 FH
Þróttarar lentu 2-0 undir eftir að hafa fengið á sig tvö mörk úr hornspyrnum en áttu svo góða endurkomu og náðu að jafna leikinn.
„Þetta voru skítamörk en við vissum alveg að við værum betra liðið og við náðum alveg að sýna það inná vellinum. Við náðum þessum tveimur mörkum í seinni hálfleiknum en því miður ekki meira en það,“ sagði Álfhildur en þetta var sjötta jafntefli liðsins í deildinni í sumar!
„Það vantar þetta pínulitla uppá. Kannski að leggja aðeins meira í þetta og sýna aðeins meiri hörku,“ svaraði fyrirliðinn aðspurð um hvað Þróttarar þyrftu að gera til að breyta þessum jafnteflum í sigra.
Framundan er landsleikjahlé á deildinni og Álfhildur segir Þróttara ætla að nýta það skynsamlega.
„Við ætlum að æfa vel og fara yfir taktísk atriði en svo er líka mikilvægt að fá smá hvíld.“
Hægt er að horfa á allt viðtalið við Álfhildi í spilaranum hér að ofan.
Athugasemdir