Ciro Immobile og félagar ferðast til Ungverjalands til að spila heimaleik gegn Maccabi Tel Aviv.
UEFA hefur staðfest að viðureign Besiktas gegn Maccabi Tel Aviv í Evrópudeildinni hafi verið færð frá Tyrklandi.
Viðureignin mun þess í stað fara fram í Debrecen, Ungverjalandi, og mun fara fram fyrir luktum dyrum.
Þessi breyting á sér stað vegna þess að tyrkneska ríkisstjórnin treysti sér ekki til að hýsa leikinn í Tyrklandi. Ríkisstjórnin getur ekki tryggt öryggi leikmanna á þessum leik vegna stríðsins sem geisir í Palestínu og þar í kring.
Ríkisstjórnin óttast að leikmenn ísraelska félagsins verði beittir ofbeldi í Tyrklandi en hingað til hafa Ungverjar verið duglegir við að hýsa bæði landsleiki og félagsliðaleiki Ísraela.
Leikurinn fer fram á fimmtudaginn 28. nóvember og er mikilvægur fyrir bæði lið. Besiktas er með 6 stig eftir fjórar fyrstu umferðirnar í deildarkeppninni á meðan Maccabi er án stiga.
Athugasemdir
