Það er heitt undir þjálfarasæti Carlo Ancelotti hjá Real Madrid, þar sem félagið virðist vera að dragast afturúr Barcelona í spænska boltanum. Barca er með góða forystu á toppi deildarinnar og vann sannfærandi sigur í úrslitaleik Ofurbikarsins fyrir mánuði síðan.
Ancelotti hefur verið orðaður við brasilíska landsliðið og var spurður út í orðróminn á fréttamannafundi.
„Ég fer ekki héðan nema ég verði rekinn," sagði Ancelotti eftir sigur í úrslitaleik HM félagsliða. „Ég er stoltur af því að vera partur af sögu Real Madrid."
Real Madrid vann 5-3 gegn Al Hilal í úrslitaleik HM félagsliða, sem var haldið í Marokkó, eftir 4-1 sigur á Al Ahly í undanúrslitunum.
„Við nutum dvalarinnar í Marokkó. Það var mikið af stuðningsmönnum Real Madrid á leikjunum. Við förum héðan mjög ánægðir."
Real á leiki við Elche, Osasuna og Liverpool á næstu sjö dögum.