Guardiola var spurður að því hvort þetta væri besta Arsenal lið sem hann hafi mætt?

„Síðan ég kom hingað, já klárlega," svaraði Guardiola sem hefur ekki tapað gegn Arsenal í ensku úrvalsdeildinni, hann hefur unnið ellefu af tólf leikjum.

Leikurinn á morgun er fyrsti deildarleikurinn milli þessara liða á tímabilinu en þau mættust í FA-bikarnum í síðasta mánuði. City vann þá 1-0 þar sem Nathan Ake skoraði sigurmarkið.

„Hingað til er Arsenal besta lið deildarinnar. Þegar við spiluðum gegn þeim fyrir nokkrum vikum fundum við hversu öflugir og beittir þeir eru. Við þurfum að vera klárir á öllum sviðum."

City vann 3-1 sigur gegn Aston Villa á sunnudaginn, daginn eftir að Arsenal gerði 1-1 jafntefli gegn Brentford.