Guðrún Elísabet Björgvinsdóttir, sem sló í gegn í Lengjudeildinni í fyrra, skoraði fernu er Afturelding lagði Þór/KA að velli í Faxaflóamótinu í dag.

Það var leikið í Mosfellsbæ og þar skoraði Guðrún Elísabet fyrsta markið eftir sex mínútur. Hún var aftur á ferðinni á 22. mínútu, en þremur mínútum eftir það minnkaði Kimberley Dóra Hjálmarsdóttir muninn fyrir Þór/KA.

Það voru hins vegar heimakonur sem áttu síðasta orðið í fyrri hálfleik; Ísafold Þórhallsdóttir gerði mark rétt fyrir leikhlé.

Guðrún Elísabet bætti svo tveimur mörkum við í seinni hálfleik. Hún skoraði 23 mörk í 17 leikjum í næst efstu deild í fyrra og verður spennandi að fylgjast með henni í efstu deild í sumar. Afturelding hefur unnið báða leiki sína í Faxaflóamótinu til þessa. Þór/KA er með þrjú stig eftir sigur gegn Stjörnunni í fyrsta leik.