Southgate hefur bæði upplifað það í starfi að fá mikið hrós, vera með ensku þjóðina á sínu bandi, og á hinn bóginn að fá gríðarlega gagnrýni frá spekingum og heift frá stuðningsmönnum.

„Hann komst nálægt gullverðlaunum en reyndist ekki vera sigurvegarinn sem England hefur þráð síðan 1966. Á EM í Þýskalandi fékk hann hæfileikaríkustu leikmenn liðsins ekki til að blómstra. Hann skilur landsliðið eftir á betri stað en var kominn á endastöð með liðið," segir McNulty.

Tók England af botninum - Sem var tapið gegn Íslandi
Það mótmæla því fáir að landsliðsþjálfarastarf Englands er líklega eitt það mest krefjandi í bransanum. Áreitið og gagnrýnin eru á hæsta stigi.

„Þetta er krefjandi og álagið mikið. Ímyndið ykkur pressuna sem þú ert undir sem einstaklingur. Þetta getur ekki hafa haft jákvæð áhrif á fjölskyldu eða vini Gareth Southgate. Þá varði hann leikmenn sína við hvert tækifæri og það tekur sinn toll. Vonandi fær hann góða hvíld áður en við sjáum hann í næsta starfi," segir Alan Shearer, fyrrum landsliðsmaður Englands.

„Áður en hann tók við virtust leikmenn ekki hafa mikla löngun í að spila fyrir þjóð sína. Það á að hrósa honum fyrir allt sem hann hefur gert. Hann hefur tekið enska landsliðið frá botninum eftir tap gegn Íslandi á EM 2016 og farið með liðið í undanúrslit og úrslitaleiki."