Ísland vann öflugan 2-0 útisigur gegn Svartfjallalandi í Þjóðadeildinni í kvöld. Orri Steinn Óskarsson skoraði fyrra mark Íslands og ræddi við Fótbolta.net eftir leikinn.
Lestu um leikinn: Svartfjallaland 0 - 2 Ísland
„Þetta var öðruvísi leikur en maður er vanur að spila. Við vissum að við værum að fara út í baráttu og seinni bolta. Auðvitað er þetta smá bras en við sýndum gæðamuninn," segir Orri.
Vallaraðstæður voru ekki sérstakar en völlurinn þó betri en þjóðarleikvangurinn sem UEFA dæmdi óleikhæfan.
„Hann var betri en völlurinn sem við æfðum á í gær og betri aðstaða."
Rétt áður en Orri skoraði fékk hann gult spjald en í pirringi hrinti hann leikmanni Svartfjallalands.
„Það var ekki góð ákvörðun hjá mér, ég tek það á mig. Ég fæ sjaldan gult spjald svo þetta verður nú ekkert vandamál í framtíðinni," segir Orri. Hvernig var að sjá boltann liggja í netinu stuttu seinna?
„Mjög mikilvægt og góð tilfinning. Við höfðum átt góðan kafla, haldið í boltann og aðeins náð að ógna. Við gerðum vel og það var gott að skora."
Varamennirnir komu allir sterkir inn og gerðu gæfumun í leiknum.
„Það breytir leiknum algjörlega þegar varamennirnir koma svona góðir inn. Að fá svona ferska fætur. Ísak og Mikael bara breyta leiknum og Gulli í fyrri hálfleik tekur stjórn á vörninni. Þetta gerir svo mikið fyrir okkur."
Viðtalið má sjá í heild í sjónvarpinu hér að ofan en þar ræðir Orri einnig um sigur Real Sociedad gegn Barcelona á dögunum.
