Fastlega búist við frestun á EM 2020
Fréttir bárust af því í morgun að UEFA hefði afpantað öll hótelherbergi sem sambandið pantaði í Kaupmannahöfn í sumar vegna mótsins. Þetta þykir sýna að búið sé þegar að ákveða frestun á mótinu.

Talið er að EM verði fært aftur um eitt ár en það mun skapa aukið svigrúm fyrir deildakeppnir Evrópu að ná að klárast.

Mun EM kvenna færast?
Ef EM karla verður fært aftur um eitt ár gæti það mögulega haft áhrif á EM kvenna sem á að fara fram á Englandi á næsta ári. Möguleiki er á að það mót fari fram 2022.

Þá er óljóst hvaða áhrif frestun EM karla hefur á Þjóðadeildina og lokakeppni Evrópumóts U21-landsliða.

Hvað verður um Meistaradeildina og Evrópudeildina?
Þetta er flóknara mál en að færa EM. Mikið óvissuástand ríkir í heiminum og verið að setja takmörkun á ferðalög. Í umræðunni er að breyta 8-liða úrslitum og undanúrslitum í eins leiks einvígi. Þá er hugmynd að undanúrslit og úrslit verði spiluð í sömu borginni yfir eina langa helgi.

Ólíklegt er að lokaákvörðun um þessar keppnir verði tekin í dag en þar verði lagð fram mögulegar áætlanir.

Hvað verður um ensku úrvalsdeildina?
Já og aðrar stórar deildakeppnir í löndunum? Frestun á EM myndi búa til aukið svigrúm til að þær deildir geti verið kláraðar. Hugmynd er að leika deildirnar um leið og mögulegt er og reyna að framlengja tímabundið samninga við þá leikmenn sem eru að renna út.

Karren Brady, varaformaður West Ham, lýsti því yfir að hún vildi að tímabilið yrði dæmt ógilt. Sú hugmynd hennar fékk vondar viðtökur og enska úrvalsdeildin er ákveðin í að fá fram niðurstöðu í tímabilið.

Fundur UEFA í dag mun þó að litlu leyti snúast um deildakeppnir Evrópu og engar stórar ákvarðanir væntanlega teknar varðandi þær. Fundurinn snýst að mestu um EM alls staðar, Meistaradeildina og Evrópudeildina.