„Þetta var bara hörkuleikur og bara jafn leikur. Fylkir er að mínu mati bara besta liðið í deildinni, svona "by far", ef ég á að vera alveg sanngjarn. En við erum búnir að vera bara fínir í seinni umferðinni, ef maður skoðar úrslitin þá er bara búinn að vera góður stöðugleiki í okkar frammistöðum,'' sagði Þorlákur Árnason, þjálfari Þórs, eftir 2-1 sigur á Fylki í lokaumferð Lengjudeildarinnar í dag.
Lestu um leikinn: Þór 2 - 1 Fylkir
Þórsarar fóru með 1-0 forystu inn í hálfleikinn, en meistarar Fylkis jöfnuðu leikinn strax í upphafi seinni hálfleiks. Var Þorlákur ánægður með að sjá leikmenn halda haus og láta það ekki brjóta sig?
„Já, bara gott að þú nefnir það. Fáum bara á okkur mark hérna í fyrstu sókn. Ef við myndum spóla einhverja 2-3 mánuði til baka, þá myndum við bara tapa þessum leik þrjú/fjögur-eitt. En við fórum þá leið að treysta á marga unga leikmenn í sumar og þeir hafa vaxið. Menn hafa alveg skitið í deigið, en koma til baka og eru að styrkjast við mótlætið í staðinn fyrir að bogna.''
Þorlákur segir að það sé öruggt að Þórsarar bæti við sig fyrir næsta tímabil.
„Ég held að það sé alveg klárt að við munum bæta í hópinn fyrir næsta tímabil. Við tókum ákveðna áhættu og misstum töluvert mikið af leikmönnum í haust og svo bara líka í sumar. Misstum Aron Inga í atvinnumennsku og tókum engan í staðinn. Þannig að við erum bara bjartsýnir og okkur finnst þetta hafa tekist vel. Þetta var mjög gott fyrsta skref, en það er mikil vinna framundan.''
Viðtalið má sjá í heild sinni í spilaranum hér að ofan.