Amad Diallo er gríðarlega efnilegur leikmaður gekk nýverið í raðir Manchester United frá Atalanta á Ítalíu.

Hann er fæddur á Fílabeinsströndinni en var smyglað til Ítalíu ásamt bróður sínum, Hamed Junior Traorè, fyrir fimm árum síðan. Samkvæmt frétt frá The Times þá voru fimm aðilar handteknir á síðasta ári fyrir að smygla fimm fótboltamönnum frá Fílabeinsströndinni til Ítalíu með fölsuðum skjölum.

Telegraph fjallar um málið en þar segir að Diallo hafi sest að í úthverfi Parma þar sem hann spilaði fyrst um sinn með Boca Barco, félagi þar í borg.

Það var fljótt ljóst að það var mikið spunnið í þennan dreng. Hann var feiminn og talaði ekki mikið, en það var á fótboltavellinum þar sem hann tjáði sig.

„Amad var alltaf sérstakur þegar boltinn var við fætur hans," segir Enzo Guerri, forseti Boca Barco.

Stærri félög fóru strax að bera kvíurnar í Diallo og það er saga um það að útsendari Roma hafi viljað semja við hann eftir að hafa horft á hann spila fótbolta í fimm mínútur. Hann fór á reynslu til Juventus og 15 mínútur eftir hans fyrstu æfingu þar, þá fékk Boca Barco símtal frá Ítalíumeisturum um að þeir vildu semja við hann.

Hann gekk hins vegar í raðir Atalanta þar sem hann blómstraði í ungingaliðunum.

„Þegar hann var á reynslu hjá Atalanta var hann látinn spila með strákum sem voru að minnsta kosti árinu eldri. Á fyrsta ári hans hjá Atalanta var hann hluti af liðinu sem vann svæðismótið og var hann markahæstur. Hann fór svo að spila á hærra stigi og varð Ítalíumeistari," sagði Guerri.

Diallo gæti kostað Man Utd allt að 37 milljónir punda, en hann skoraði sitt fyrsta mark fyrir félagið í 1-1 jafntefli við AC Milan í Evrópudeildinni í síðustu viku. United mætir AC Milan í seinni leik liðanna í kvöld og verður gaman að sjá hvort þessi hæfileikaríki leikmaður fái tækifæri.

„Hann er að leggja mikið á sig. Hann veit að hann á mikið eftir ólært," sagði Ole Gunnar Solskjær, stjóri Manchester United, um hann en það er miklar væntingar bornar til hans fyrir framtíðina.

STUÐNINGSSVEIT
FÓTBOLTA.NET

Tryggjum framtíð Fótbolta.net

Fótbolti.net er eini stóri fjölmiðillinn á Íslandi sem nýtur ekki ríkisstyrkja.

Gakktu í stuðningssveitina og hjálpaðu okkur að tryggja áframhaldandi öfluga umfjöllun um fótbolta.

STYRKJA

Tweet

Senda a Facebook Hafdu samband Senda frétt Prenta frétt Frétta leit