Hollenskir fjölmiðlar greina frá því að íslenski landsliðsmaðurinn Albert Guðmundsson hafi verið látinn æfa með varaliði AZ Alkmaar undanfarna daga.
Í þeim tveimur deildarleikjum sem Pascal Jansen hefur stýrt síðan Arne Slot var rekinn hefur Albert verið ónotaður varamaður. Hann verður svo að öllum líkindum utan hóps í leik gegn Willem II.
Voetbalzone segir að Jansen sé að refsa Alberti en ekki er vitað fyrir hvað. Ágiskanir eru í gangi um að Albert hafi verið ósáttur við hlutverk sitt í liðinu.
Albert klúðraði dauðafæri þegar AZ tapaði fyrir NK Rijeka frá Króatíu í Evrópudeildinni. AZ Alkmaar féll úr leik í Evrópudeildinni en fyrir það var Slot rekinn eftir að fréttir bárust af því að hann væri í viðræðum við Feyenoord og mikill titringur myndaðist innan félagsins.
Pascal Jansen tók við til bráðabirgða eftir að Slot var rekinn en hann hafði verið hans aðstoðarmaður.
Athugasemdir