Lyngby og Nordsjælland áttust við í dönsku úrvalsdeildinni í dag en þarna var botnliðið að fá toppliðið í heimsókn.
Staðan var markalaus í hálfleik en Wahid Faghir kom Nordsjælland í forystuna á 59. mínútu og það leit allt út fyrir að þetta yrði sigurmark leiksins.
Freyr Alexandersson setti Alfreð Finnbogason inná fyrir Brian Hamalainen þegar um tuttugu mínútur voru til leiksloka og það átti heldur betur eftir að borga sig.
Alfreð náði að jafna metin fyrir Lyngby þegar tvær mínútur voru komnar fram yfir venjulegan leiktíma og tryggði liðinu því eitt stig.
Sævar Atli Magnússon var í byrjunarliði Lyngby í leiknum og spilaði hann 80. mínútur. Kolbeinn Birgir Finnsson spilaði hálftíma í dag en þetta var einungis níunda stig Lyngby í átján leikjum.
Viborg getur nú minnkað forskot Nordsjælland á toppnum niður í eitt stig.
