Mynd: EPA

Mynd: EPA

Torino tók á móti botnliði Cremonese í lokaleik 23. umferðar ítalska deildartímabilsins.

Heimamenn í Torino voru sterkari stærsta hluta leiksins en gestirnir gáfust aldrei upp og komust nálægt því að stela öllum stigunum.

Leikmenn Torino leiddu 1-0 í hálfleik en voru óheppnir að skora ekki meira fyrir leikhlé. Antonio Sanabria gerði eina mark liðsins úr vítaspyrnu á 41. mínútu.

Síðari hálfleikurinn var jafnari þar sem gestirnir frá Cremona voru hættulegir og náðu að skora tvö mörk úr þokkalega erfiðum færum. Fyrst skoraði Frank Tsadjout og svo kom bakvörðurinn Emanuele Valeri gestunum yfir en gleðin varði ekki í langan tíma.

Fimm mínútum síðar var bakvörðurinn sókndjarfi Wilfried Singo búinn að jafna með góðu marki þar sem hann gerði vel að halda ró sinni og plata varnarmann Cremonese upp úr skónum áður en hann skoraði. 

Meira var ekki skorað og urðu lokatölurnar 2-2. Cremonese er áfram á botni deildarinnar, með 9 stig eftir 23 umferðir. Torino siglir lygnan sjó í efri hlutanum, tíu stigum frá Evrópubaráttunni.

Cremonese er tíu stigum frá öruggu sæti í deildinni.